Masmur 89

₂Katrésnané GUSTI bakal kula kidungké selawasé,

kasetian Panjenengan bakal kula kabaraké karo tutuk kula turun-temurun.

₃Awit kawelasan Panjenengan dibangun tekan sak lawas-lawasé;

kasetian Panjenengan jejek kaya langit.

₄Panjenengan wis ngomong: “Aku wis nggawé perjanjian karo pilihan-Ku,

Aku wis sumpah marang Daved, abdi-Ku.

₅Wijimu Tak tetepké tekan sak lawas-lawasé,

lan damparmu Tak bangun nganti turun-temurun.” Sela

₆Awit sangka kuwi langit ngutyap sukur awit sangka mujijat Panjenengan, duh GUSTI,

malah ya jalaran sangka kasetian Panjenengan

ing sak tengahé pasamuané para sutyi.

₇Awit ing mendung-mendung kuwi sapa sing madani GUSTI,

lan ing antarané para sing manggon ing swarga

sapa sing madani GUSTI?

₈Gusti Allah diwedèni karo golongané para sutyi,

lan banget diwedèni ngungkuli kabèh sing pada manggon ing sak kiwa-tengené.

₉Duh GUSTI, Gusti Allah sing ngwasani langit lan bumi, sapa sing kaya Panjenengan?

Panjenengan kuwi kuwat, duh GUSTI lan kasetian Panjenengan ing sak ubengé Panjenengan.

₁₀Gemunggungé segara kuwi Panjenengan sing mréntah,

yèn aluné gedé Panjenengan sing ngendekké.

₁₁Rahab wis Panjenengan remuk kaya wong sing mati,

mungsuh Panjenengan wis Panjenengan buyaraké karo tangan Panjenengan sing rosa.

₁₂Langit kuwi duwèké Panjenengan, bumi kuwi uga duwèké Panjenengan,

ndonya sak isiné kabèh kuwi Panjenengan sing ndasari.

₁₃Lor lan kidul kuwi Panjenengan sing nggawé,

gunung Tabor lan Hèrmon pada bungah-bungah

surak-surak awit sangka asma Panjenengan.

₁₄Panjenengan sing nduwé lengen kuwat

tangan Panjenengan kuwi rosa lan luhur tangan Panjenengan tengen.

₁₅Kabeneran karo keadilan dadi dasaré dampar Panjenengan,

kawelasan lan kasetian pada mlaku ing ngarepé Panjenengan.

₁₆Rahayu bangsa sing bisa surak-surak,

duh GUSTI, uripé keslorotan karo praupan Panjenengan,

₁₇pada surak-surak sedina muput awit sangka asma Panjenengan,

lan pada rumangsa luhur awit keadilan Panjenengan.

₁₈Awit Panjenengan sing dadi kamulyané kekuwatané,

sungu kula diunggulké awit sangka senengé ati Panjenengan.

₁₉Awit tamèngé kita kuwi duwèké GUSTI,

lan ratu kula kuwi duwèké Gusti Allahé Israèl, sing Sutyi.

₂₀Wis tau ana tembungé Panjenengan karo wahyu marang para wong sing Panjenengan trésnani,

isiné: “Aku wis ngekèki makuta marang sakwijiné pahlawan,

sakwijiné wong pilihan wis Tak junjung sangka antarané bangsa kuwi.

₂₁Aku wis nemu Daved, abdi-Ku,

sing wis Tak jebatani karo lenga-Ku sing sutyi.

₂₂Kuwi bakal tetep Tak rumati karo tangan-Ku,

lan Tak santosaké karo lengen-Ku.

₂₃Kuwi ora bakal dilawan karo mungsuh,

uga ditelukaké karo wong lityik.

₂₄Mungsuhé bakal pada Tak remuk ing ngarepé,

lan sing pada nyengiti bakal Tak entèkké

₂₅Kuwi bakal dituntun karo kasetian lan katrésnan-Ku,

lan sunguné bakal diunggulké karo asma-Ku,

₂₆Aku bakal ndadèkké tangané ngwasani segara,

lan tangané tengen ngwasani kali-kali.

₂₇Nyebuté marang Aku bakal mengkéné: ‘Panjenengan kuwi Bapak kula,

Gusti Allah kula lan gunung watu keslametan kula.’

₂₈Lan ya bakal Tak junjung dadi anak mbarep,

lan sing luhur déwé ing antarané para ratu ing sak lumahé bumi.

₂₉Kasetian-Ku marang dèwèké bakal Tak lestarèkké tekan selawasé,

lan perjanjian-Ku bakal tetep kanggo dèwèké.

₃₀Anak putuné Tak lestarèkké terusan tekan selawasé,

uga damparé ing sak umuré langit.

₃₁Yèn anak putuné pada nglalèkké angger-angger-Ku,

lan mlakuné ora miturut karo pernatan-Ku,

₃₂lan pada nerak marang katetepan-Ku,

lan ora netepi pepakon-Ku,

₃₃paneraké mesti pada Tak wales karo gepuk,

lan kesalahané karo gebuk.

₃₄Nanging kasetian-Ku bakal ora Tak adohaké sangka Daved,

lan Aku ora bakal nyélaki kasetian-Ku.

₃₅Aku ora bakal nerak marang perjanjianku,

lan apa sing kebukak sangka ilat-Ku ora bakal Tak owahi.

₃₆Sepisan Aku wis sumpah kanggo kesutyian-Ku,

mesti Aku ora bakal goroh marang Daved.

₃₇Turun-turunané bakal tetep sak lawas-lawasé,

lan damparé kaya srengéngé ing ngarep-Ku,

₃₈kaya mbulan ing sak lawas-lawasé

kanggo seksi sing setia tuhu ing mendung.” Sela

₃₉Nanging Panjenengan piyambak nampik lan mbuwang,

lan nibakké bebendu Panjenengan marang sing Panjenengan jebatani,

₄₀perjanjian Panjenengan karo abdi Panjenengan batalké,

makutané Panjenengan regeti kaya lebu,

₄₁témboké Panjenengan ambruké,

bèntèng-bèntèngé Panjenengan dadèkké ambruk.

₄₂Kabèh wong sing liwat ing dalan pada ngrayahi,

lan dadi tyatyatan kanggo tangga teparo.

₄₃Tangan tengené para mungsuhé pada Panjenengan duwuraké,

kabèh mungsuh-mungsuhé wis pada Panjenengan nggawé bungah-bungah.

₄₄Landepé pedangé Panjenengan digawé mbalik,

Panjenengan ora nggawé supaya bisa kuwat ing peperangan.

₄₅Padangé Panjenengan dibleretké,

lan damparé Panjenengan diambrukké ing lemah.

₄₆Dina enomé wis Panjenengan tyendekké;

dèwèké Panjenengan krukupi karo kewirangan. Sela

₄₇Duh GUSTI, nganti pira suwéné enggèn Panjenengan tansah ing pandelikan,

lan anggèné bebendu Panjenengan mulat-mulat kaya geni kuwi?

₄₈Panjenengan supaya gelem éling apa tegesé urip kuwi sak pira ta suwéné,

apa tanpa nggawé enggèn Panjenengan sing nggawé kabèh anaké manungsa kuwi?

₄₉Wong urip ing ngendi sing ora bakal ngalami mati,

sing bisa ngutyuli nyawané sangka kwasané ndonyané wong mati? Sela

₅₀Duh Gusti, endi kawelasan Panjenengan sing wiwitan,

sing Panjenengan janjèkké marang Daved nganggo sumpah karo kasetian Panjenengan kuwi?

₅₁Duh Gusti, Panjenengan supaya gelem éling yèn abdi Panjenengan disepatani,

lan kula nyangga ing njeruhné ati, ngalami dienyèk-enyèk karo para bangsa.

₅₂Sing diomongké para mungsuh Panjenengan, duh GUSTI,

sing diomongké kanggo nyepèlèkké tindak-tanduké wong sing Panjenengan jebatani.

₅₃Pinujia GUSTI sak lawasé. Amin. Amin!