Masmur 90

Duh Gusti, Panjenengan kuwi dadi pangungsèn kita turun-temurun.

₂Sak durungé gunung-gunung dilairké,

lan sak durungé Panjenengan nggawé bumi lan ndonya,

wiwit kelanggengan tekan kelanggengan Panjenengan kuwi Gusti Allah.

₃Panjenengan mbalèkké manungsa dadi lebu,

lan préntah: “Hé para anak-anaké manungsa, pada balia!”

₄Awit 1000 taun kuwi ing mripat Panjenengan,

pada kaya dina wingi sing kepungkur,

ya pada kaya gilirané jaga ing wantyi wengi.

₅Manungsa Panjenengan kéntéraké; pada kaya ngimpi,

kaya tukulé suket.

₆Ing wantyi ésuk kembang lan seger tukulé,

soréné wis semplak terus alum.

₇Tenan, kita pada entèk awit sangka bebendu Panjenengan,

lan ketiban rasa wedi awit sangka panasé-nesuné Panjenengan.

₈Kesalahané kita Panjenengan bèbèr ing ngarepé Panjenengan,

lan ala kita sing didelikké ing pepadangé sloroté praupan Panjenengan.

₉Tenan dina kita pada liwat awit sangka bendu Panjenengan,

taun-taun kita, kita entèkké kaya waé sambat.

₁₀Suwéné urip kita kuwi pitung puluh taun,

nanging yèn kita pada kuwat, wolung puluh taun,

lan sing digedèk-gedèké kuwi anggèné ngalami rekasa lan sangsara,

awit mlakuné gelis banget lan kita pada kabur entèk.

₁₁Sapa sing ngerti kekuwatané bebendu Panjenengan,

lan wedi marang enggèn Panjenengan nesu?

₁₂Wulangana kita supaya ngitung dina kita sing sak mestiné,

supaya bisaa olèh ati sing wityaksana.

₁₃Duh GUSTI, Panjenengan supaya gelem mbalik! Nganti kapan?

Supaya gelem melasi para abdi Panjenengan.

₁₄Supaya ing wantyi ésuk kita pada Panjenengan wareki karo kawelasan Panjenengan

nganti kita terus pada surak-surak lan bungah-bungah sak lawasé kita urip.

₁₅Kita supaya pada Panjenengan kèki kebungahan sing sak pantesé karo suwéné dina-dina enggèn Panjenengan ngekèki kangèlan,

lan sak pantesé karo suwéné taun-taun enggèn kita ngrasaké tyilaka.

₁₆Penggawéané Panjenengan supaya bisaa kétok marang para abdi Panjenengan,

lan kamulyan Panjenengan marang anak-anaké.

₁₇Kabetyikané Gusti Allah kita, supaya ngayomi kita,

lan Panjenengan supaya gelem nguwatké penggawéané tangan kita,

ya penggawéané tangan kita, kuwi supaya dikuwatké.