Masmur 91

₁Wong sing manggon ing pangayomané sing Mahaluhur

lan nginep ing pengayomané sing Mahakwasa,

₂kuwi bakal nyebut GUSTI mengkéné: “Pangungsèn lan bèntèng kula,

Gusti Allah kula sing kula endelaké.”

₃Tenan Panjenengané kuwi sing bakal nylametaké kowé sangka jireté tukang njala,

lan sangka lara pès sing mbebayani.

₄Kowé bakal dikemuli karo sewiwi-Né,

bakal dislametké ing sak ngisoré sewiwi-Né,

kasetian-Né kuwi kanggo tamèng lan pager témbok.

₅Kowé ora usah wedi marang bebaya ing wayah mbengi,

marang panah sing nylorot ing wayah awan,

₆marang lara pès sing mlaku ing pepeteng,

lan marang lara pès sing ngamuk ing wayah soré.

₇Senajan ing sandingmu ana wong sing ambruk 1000,

lan 10.000 ing tengenmu,

nanging kowé déwé ora bakal dikenèng;

₈kuwi mung kok sawang karo mripatmu,

lan weruh balesané marang para wong duraka.

₉Awit GUSTI kuwi dadi pangayomanmu,

sing Mahaluhur kuwi wis kok dadèkké pangayomanmu,

₁₀Kowé ora bakal katekan tyilaka,

lan ora ana bebendu sing nyedaki tarupmu;

₁₁awit Gusti bakal mréntah para mulékaté kanggo kowé,

supaya njaga kowé ing kabèh dalanmu.

₁₂Kowé bakal ditadahi karo tangané,

supaya kowé aja nganti kesandung karo watu.

₁₃Singa lan ula upas bakal pada kok langkahi,

singa nom lan ula naga bakal kok idak-idak.

₁₄“Tenan, atiné rumaket marang Aku, mulané bakal Tak luwari,

bakal Tak pageri kuwat awit kenal marang asma-Ku.

₁₅Yèn sambat marang Aku, bakal Tak rungokké,

ing sak njeruhné kangèlan bakal Tak tuntun,

bakal Tak etokké lan Tak luhurké,

₁₆bakal Tak wareki karo umur dawa,

lan keslametan-Ku bakal Tak duduhké marang dèwèké.”