Masmur 92

₂Maturkesuwun marang GUSTI karo kidungan kuwi apik,

mengkono uga nyanyèkké kidung masmur marang asma Gusti,

duh Gusti Allah sing Mahaluhur,

₃kula nyeritakké kabetyikané Gusti ing wantyi ésuk

lan kasetiané Gusti ing wantyi wengi,

₄karo ngunèkné unèn-unèn sepuluh tali karo terbangan,

bareng karo swarané siter.

₅Nanging Panjenengan, duh GUSTI, wis mbungahké kula karo penggawéané Panjenengan,

kula bakal surak-surak awit sangka penggawéané tangan Panjenengan.

₆Duh GUSTI, tenan gedé penggawéané Panjenengan,

lan banget jeru rantyamané Panjenengan kuwi.

₇Wong bodo ora bakal weruh,

lan wong goblok uga ora bakal ngerti bab kuwi.

₈Yèn wong duraka anggèné urip pada kaya tetukulan,

lan wong sing nandangi ala pada tukul subur

kuwi supaya pada dientèkké ing sak lawas-lawasé.

₉Nanging, duh GUSTI, Panjenengan ing nduwur tekan sak lawasé.

₁₀Awit tenan mungsuh Panjenengan, duh GUSTI,

ya tenan mungsuh Panjenengan bakal entèk,

kabèh wong sing nandangi ala bakal dibuyaraké.

₁₁Nanging sungu kula Panjenengan unggahké kaya sunguné sapi alasan,

kula diesoki karo lenga murni sing anyar;

₁₂mripatku nyawang satruku, kupingku krungu bab wong ala sing pada ngadek nglawan aku.

₁₃Wong bener bakal tukul kaya wit kurma,

lan tukul subur kaya wit tyemara sangka Libanon;

₁₄para wong sing ditandur ing griyané GUSTI,

bakal pada tukul ing lataré Gusti Allah kita,

₁₅senajan wis tuwa ijik pada metu wohé,

pada dadi lemu lan seger,

₁₆supaya bisa nyritakké yèn GUSTI kuwi bener,

gunung watuku sing adoh sangka laku goroh.