Masmur 94

₁Duh Gusti Allah sing nibakké balesan, duh GUSTI,

duh Gusti Allah sing nibakké balesan,

Panjenengan supaya gelem ngadek!

₂Duh Rèkteré jagat, supaya gelem ngadek,

supaya gelem nibakké balesan marang sak rupané penggawéané wong sombong!

₃Nganti sak pira suwéné menèh para wong duraka, duh GUSTI,

nganti sak pira suwéné menèh wong duraka pada seneng-seneng?

₄Wong-wong iki pada muntahké tembung-tembung sing kurang ajar,

lan sak okèhé wong sing nandangi ala pada gemunggung.

₅Duh GUSTI, wong iki pada ngiles-ngiles umat Panjenengan,

lan para duwèké Panjenengan piyambak pada ditindes;

₆pada mbelèhi randa lan wong mantya,

lan matèni botyah lola;

₇lan pada ngomong mengkéné: “GUSTI ora weruh,

lan Gusti Allahé Yakub ora nggatèkké.”

₈Hé! para wong sing bodo tunggalé rayat, pada gatèkna!

Hé! para wong goblok, piyé enggonmu pada bisa mikir?

₉Gusti Allah sing masang kuping apa ora krungu?

Sing nggawé mripat apa ora weruh?

₁₀Sing ngekèki piwulang marang para bangsa, apa ora nibakké paukuman?

Panjenengané sing mulangké kaweruh marang manungsa?

₁₁GUSTI ngerti kabèh rantyamané manungsa,

kuwi kabèh sejatiné tanpa guna.

₁₂Duh GUSTI, rahayu wong sing Panjenengan ajar,

sing Panjenengan wulangi sangka angger-angger Panjenengan,

₁₃supaya kenènga digawé nentremaké atiné ing njeruhné ngalami kangèlan,

nganti tekan waktuné wong duraka diduduké juglangan.

₁₄Nanging GUSTI ora négakké umaté,

lan ora bakal ninggalké marang umat duwèké.

₁₅Awit putusané hukum bakal bali marang keadilan,

lan diturut karo kabèh wong sing tulus atiné.

₁₆Sapa sing ngréwangi aku nglawan marang para wong ala,

sapa sing ngréwangi aku nglawan marang para wong sing nglakoni sing ala?

₁₇Yèn duduk GUSTI sing mitulungi aku,

mèh waé aku manggon ing jagat suwung.

₁₈Waktu kula mikir: “Sikilku déglok,”

terus dikuwatké karo kawelasané Panjenengan.

₁₉Yèn ing batin kula saya mundak okèh sing kula pikir;

panglipuran Panjenengan sing ngayemké ati kula.

₂₀Panjenengan apa bakal nunggal karo damparé ala,

sing ngrantyam tyilaka karo katetepan?

₂₁Pada bebarengan nglawan nyawané wong bener,

lan getihé wong sing ora salah diarani duraka.

₂₂Nanging GUSTI kuwi bèntèngku sing kuwat,

lan Gusti Allahku kuwi gunung watuku pangungsènku.

₂₃Gusti Allah sing mbales penggawé alané wong-wong mau,

lan jalaran sangka penggawé alané bakal pada dientèkké.

GUSTI, Gusti Allah kita, bakal ngentèkké wong-wong kuwi.