Masmur 95

₁Hayuk pada surak-surak ing ngarepé GUSTI,

surak-surak kanggo Gunung watu keslametan kita.

₂Hayuk pada madep ing ngarepé karo kidung maturkesuwun,

surak-surak karo kidung masmur ing ngarepé.

₃Awit GUSTI kuwi Gusti Allah sing gedé,

lan Ratu gedé sing ngungkuli kabèh allah.

₄Telengé bumi ing tangan-Né,

putyuké gunung-gunung kuwi uga duwèké.

₅Segara uga duwèké, Panjenengané sing nggawé,

lan tangan-Né sing nggawé daratan.

₆Mlebua, hayuk pada ndingkluk sujut,

pada nyembah ing ngarepé GUSTI, sing nggawé kita,

₇awit Panjenengané kuwi Gusti Allah kita,

kita kuwi umat ngon-ngonan-Né, pepantan wedus gèmbèl rumatan-Né.

Ing dina iki kowé mbok ya pada ngrungokké swara-Né!

₈Kowé aja ngatoské atimu kaya waktu nang Mériba,

kaya ing wantyi ing Masa nang ara-ara samun,

₉waktu leluhurmu pada njajal Aku,

pada njajal Aku, senajan wis pada weruh penggawéan-Ku.

₁₀Patang puluh taun suwéné enggon-Ku pegel ing ati bab kuwi.

Tembung-Ku: “Kuwi bangsa sing kesasar atiné,

pada ora weruh dalan sing Tak duduhké.”

₁₁Mulané Aku wis sumpah sak njeruhné nesu-Ku:

“Wong-wong kuwi mesti ora bakal mlebu ing panggonan-Ku.”