Masmur 96

₁Pada ngluhurna GUSTI karo kidung anyar,

hé wong sak lumahé bumi, pada ngidunga kanggo GUSTI!

₂Pada ngidunga kanggo GUSTI, luhurna asmané,

pawèhé keslametan kuwi wartakna ing saben dina.

₃Pada tyritakna kamulyan-Né ing antarané para bangsa,

lan mujijat ing antarané kabèh taleré bangsa.

₄Awit GUSTI kuwi Mahaluhur lan banget pinujiné,

lan ngidap-idapi ngungkuli kabèh para allah.

₅Awit kabèh allahé para bangsa kuwi tanpa guna,

nanging GUSTI kuwi sing nggawé langit,

₆kahurmatan lan kamulyan ing ngarepé Gusti,

karosan lan kehormatan ing panggonan griya sutyi-Né.

₇Hé kabèh para taleré bangsa, ngakoni marang GUSTI,

ya mung marang GUSTI kamulyan lan karosan kuwi!

₈GUSTI pasrahana kamulyané asma-Né,

nggawaa pisungsung lan ngadepa ing plataran-Né.

₉Pada sujuta marang GUSTI karo nganggo kesutyian,

hé sak ratané bumi kabèh, gemetera ing ngarepé Gusti.

₁₀Pada wartakna ing antarané para bangsa:

“GUSTI kuwi Ratu!

Tenan ndonya kuwi jejek kuwat, ora goyang,

Panjenengané bakal ngadili para bangsa karo sing bener.”

₁₁Langit bèn bungah-bungah lan bumi surak-surak,

lan segara uga sak isiné bèn pada gemrubuk!

₁₂Ara-ara uga sak isiné bèn pada bungah;

ing kono kabèh wit-witan ing alas pada surak-surak,

₁₃ing ngarepé GUSTI, awit Panjenengané teka,

awit teka-Né bakal ngadili ndonya,

ndonya bakal diadili karo adil,

lan para bangsa karo kasetian-Né.