Masmur 97

₁GUSTI kuwi Ratu, sak lumahé bumi bèn surak-surak,

puluh-puluh bèn okèh sing pada bungah!

₂Panjenengané kubengan karo mendung lan pepeteng,

keadilan lan pernatan sing dadi dasaré dampar-Ré.

₃Geni mlaku ing ngarepé,

lan nggosongké mungsuhé ing sak kiwa-tengené.

₄Kilaté pada madangi ndonya,

bumi weruh lan nganti gemeter.

₅Gunung-gunung terus ndlèdèk kaya lilin ing ngarepé GUSTI,

ing ngarepé Gustiné sak lumahé bumi.

₆Langit ngabarké keadilan-Né,

lan kabèh bangsa pada nyawang kaluhuran-Né.

₇Sak rupané wong sing ngabekti marang retya bakal pada ngalami kisinan,

wong sing pada gemunggung awit sangka brahala-brahala;

kabèh allah pada sujut nyembah marang Panjenengané.

₈Sion krungu kabar iki, nganti bungah,

lan para anaké wadon Yéhuda pada surak-surak,

awit sangka paukuman Panjenengan, duh GUSTI.

₉Awit Panjenengan kuwi, duh GUSTI, sing Mahaluhur,

sing ngwasani sak lumahé bumi, Panjenengan diluhurké banget ngliwati kabèh allah.

₁₀Hé wong sing pada trésna marang GUSTI pada sengita marang sing ala!

Panjenengané sing njaga nyawané para wong sing ditrésnani,

bakal ngluwari wong-wong kuwi sangka tangané para wong duraka.

₁₁Pepadang wis semlorot kanggo para wong bener,

lan kabungahan kanggo para wong sing jujur atiné.

₁₂Hé para wong bener, pada bungah-bungaha awit sangka GUSTI,

lan memujia kidung kesuwun kanggo asma-Né sing sutyi.