Rum 8

₁Dadiné saiki wis ora ana paukuman menèh kanggo wong sing dadi siji karo Kristus Yésus. ₂Awit angger-anggeré Roh sing ngekèki urip, wis ngluwari kowé kabèh ing Kristus, sangka angger-anggeré dosa lan pati. ₃Awit apa sing ora bisa ditindakké karo angger-anggeré Torèt jalaran tanpa kekuwatan awit karo daging, wis ditindakké karo Gusti Allah karo ngutus Putrané piyambak, pada kaya manungsa sing dikwasani dosa awit dosa, Panjenengané wis nibakké paukuman kanggo dosa ing sak njeruhné daging, ₄supaya apa sing dadi tuntutané angger-anggeré Torèt kelakon ing kita, sing ora pada urip nuruti daging, nanging miturut marang Roh. ₅Awit wong sing urip miturut daging, kuwi pada mikirké perkara-perkara sing sangka daging; nanging wong sing uripé miturut marang Roh, kuwi pada mikirké perkara-perkara sing sangka Roh. ₆Awit kepénginané daging kuwi pati, nanging kepénginané Roh kuwi urip lan katentreman. ₇Awit kepénginan daging kuwi nyatru marang Gusti Allah, awit ora tyotyok marang angger-anggeré Gusti Allah, lan pantyèn ya ora bisa. ₈Wong sing urip miturut daging kuwi ora bakal ndadèkké senengé Gusti Allah.

₉Nanging kowé kuwi pada ora urip miturut daging, nanging miturut Roh, mengkono kuwi yèn Rohé Gusti Allah pantyèn manggon ing kowé. Nanging sapa sing ora kanggonan Rohé Kristus, wong kuwi duduk duwèké Kristus. ₁₀Nanging yèn Kristus manggon ing kowé, senajan badan kuwi mati awit sangka dosa, nanging roh kuwi urip awit sangka dibeneraké. ₁₁Yèn Rohé sing wis nangèkké Yésus sangka antarané wong mati kuwi manggon ing kowé, dadiné sing wis nangèkké Kristus sangka antarané wong mati kuwi ya bakal nguripké badanmu sing kena pati kuwi, lantaran Roh sing manggon ing kowé.

₁₂Mulané para sedulur, kita iki pada dadi wong sing kepotangan, nanging ora marang daging supaya urip nuruti daging. ₁₃Awit yèn urip nuruti daging, kowé bakal pada mati; nanging yèn karo Roh kowé matèni penggawéané badanmu, kowé bakal pada urip. ₁₄Sak kabèhé wong sing ketuntun karo Rohé Gusti Allah, kuwi pada dadi anaké Gusti Allah. ₁₅Awit kowé pada ora nampani rohé batur sing njalari kowé dadi wedi menèh, nanging kowé wis pada nampani Roh sing njalari kowé dadi anaké Gusti Allah. Awit sangka Roh kuwi kita terus pada nyebut: “Abba, Bapak!” ₁₆Roh kuwi nyeksèni bebarengan karo roh kita, yèn kita kuwi para anaké Gusti Allah. ₁₇Nanging yèn kita iki dadi anak, ya dadi juru waris, tegesé wong sing pada nduwèni hak nampani perjanjiané Gusti Allah, sing bakal ditampa bebarengan karo Kristus, ya kuwi yèn kita pada mèlu ngalami sangsara karo Panjenengané, supaya kita ya mèlu dimulyakaké bareng karo Panjenengané.

₁₈Awit aku yakin, yèn kasangsaran ing jaman saiki kuwi ora bisa dipadakaké karo kamulyan sing bakal dikèkké marang kita.

₁₉Awit karo banget kangené sak kabèhé sing urip enggoné pada ngentèn-entèni marang wantyi kedadiané para anaké Gusti Allah. ₂₀Awit sak kabèhé sing urip wis ditelukké marang perkara-perkara sing tanpa guna, ora sangka karepé déwé, nanging awit sangka karepé Panjenengané sing nelukké, ₂₁nanging sak njeruhné pengarep-arep, awit sing urip kuwi déwé uga bakal ditulungi sangka dadi baturé karusakan, lan mlebu marang kamerdikan lan kamulyan-Né para anaké Gusti Allah. ₂₂Awit kita pada mangertèni, yèn nganti sepréné sak kabèhé sing urip kuwi ya pada sambat lan ya pada ngrasakaké larané kaya wong sing arep nglairké. ₂₃Ora mung wong-wong kuwi waé, nanging kita sing wis dikèki Roh kanggo berkah wiwitan, uga pada sambat sak njeruhné ati karo ngentèn-entèni wantyiné diangkat dadi anak, ya kuwi kanggo ngluwari badan kita. ₂₄Awit kita pada dislametké ing pengarep-arep. Nanging pengarep-arep sing kétok kuwi duduk pengarep-arep menèh, awit kepriyé wong ijik ngarep-arep barang sing wis dideleng? ₂₅Nanging yèn kita ngarep-arep marang apa sing ora kita deleng, enggon kita ngarep-arep kuwi karo sabar.

₂₆Mengkono uga Roh ya ngréwangi kita ing sak njeruhné karingkihané kita; awit kita ora mangertèni kepriyé kuduné enggon kita ndedonga; nanging Roh déwé ngomongké panyuwun marang Gusti Allah, karo sambat sing ora bisa diutyapké. ₂₇Lan Gusti Allah sing nliti pikirané ati, weruh karepé Roh, ya kuwi yèn Panjenengané ndedonga kanggo para sutyi, tyotyok karo karepé Gusti Allah. ₂₈Saiki kita pada mangertèni, yèn Gusti Allah uga nyambutgawé ing samubarang kabèh, kanggo nekakké kabetyikan marang wong sing pada trésna marang Panjenengané, ya kuwi para sing dipanggil miturut karepé Gusti Allah. ₂₉Awit wong kabèh sing wis dipilih sangka wiwitan karo Panjenengané, kuwi ya ditentokké sangka wiwitan dadi mada rupa karo gambaré Putrané, supaya Putrané kuwi dadi sing mbarep ing antarané sedulur kabèh. ₃₀Wong-wong sing pada ditentokké sangka wiwitan kuwi ya pada dipanggil. Lan sing wis pada dipanggil, kuwi ya pada dibeneraké. Lan uga sing wis dibeneraké, kuwi ya pada dimulyakaké.

₃₁Awit kuwi apa sing bakal kita omongaké kanggo kabèh mau? Yèn Gusti Allah ing pihak kita, sapa sing bakal nglawan kita? ₃₂Panjenengané sing ora ngéman Putrané piyambak, nanging malah nganti masrahké Panjenengané kanggo kita kabèh, apa ya kelakon ora ngekèkké samubarang kabèh marang kita bareng karo Panjenengané? ₃₃Sapa sing bakal nggugat para pilihané Gusti Allah? Gusti Allah sing mbenerké wong-wong mau? Sapa sing bakal nibakké paukuman? ₃₄Apa Kristus Yésus sing wis ninggal? Malah luwih sangka kuwi, sing wis tangi, sing njagong ing sak tengené Gusti Allah, malah dadi sing mbélani kita? ₃₅Sapa sing bakal misahké kita sangka katrésnané Kristus? Apa penggawé ala, apa kasangsarané, apa dikuya-kuya, apa kaliren, apa wuda, apa bebaya, apa pedang? ₃₆Kaya sing wis ketulis: