1Dan Yakob seni kari ala den manpikin fu en. A taigi den taki: “Un kon tnapu dyaso lontu mi, dan mi sa taigi unu fa sani sa de gi unu ini den ten di de fu kon.
2Un kon tnapu, manpikin fu Yakob,
dan un arki un p'pa Israel.
3Ruben, mi fosi boi.
Mi fosi pikin,
di mi meki nanga mi krakti.
Yu na a moro prenspari wan fu kisi grani,
a moro prenspari wan ini makti.
4Yu, di e kuku skuma leki trubu watra,
yu no sa de a moro prenspari wan.
Bika yu pori a bedi fu yu p'pa.
Yu kren tapu en bedi,
yu sribi nanga en wefi.
5Simeon nanga Lefi, na tu anu tapu wan bere.
Nanga den fetisani fu unu un e du soso ogri.
6Mi no sa teki prati te den e meki mofo fu du wan sani,
mi no sa sidon makandra nanga den.
Bika den kiri sma ini den atibron,
nanga prisiri den koti a bakafututitei fu den kaw.
7Mi e fluku den fu a atibron fu den,
a atibron di e meki den du ogri.
Mi sa prati den bakapikin fu den ini a kondre fu Yakob,
panya den na ini Israel.
8Yuda, den brada fu yu sa prijse yu.
Yu sa basi den feyanti fu yu.
Den manpikin fu mi sa boigi gi yu.
9Yuda, mi boi, wan pikin lew yu de,
di kiri, di nyan,
dan a suku en nesi baka.
Leki wan lew a e hari lesi, dan a e kanti didon.
Suma sa prefuru fu trobi en?
10A kownutiki sa de fu têgo ini Yuda anu.
A tiki fu makti no sa kmoto fu mindri en futu.
Den folku sa gi en grani
èn saka densrefi gi en.
11A sa tai en buriki na den droifibon fu en,
na den spesrutu droifibon fu en a o tai wan yongu buriki.
A o wasi en krosi na ini win,
Na ini a redi watra fu den droifi
a wasi en dyakti.
12En ai sa kon redi fu a win,
en tifi sa kon weti fu a merki.
13Sebulon sa libi na sekanti.
Iya, a sa de wan lanpe gi sipi.
A kontren fu en sa doro te na Sidon.
14Isakar na wan tranga buriki,
di didon na mindri den lai.
15Te a si o switi a de fu rostu
èn fa a kondre moi,
a e bokru en baka fu tyari a lai,
a e gi ensrefi fu du hebi wroko.
16Dan sa tiri en pipel,
leki den tra lo fu Israel.
17A sa de leki wan takru sneki,
di didon tapu a pasi.
A sa beti a asi na en bakafutu,
meki a asi trowe en basi.
18MASRA, na yu mi e wakti fu Yu ferlusu mi.
19Wan grupu fufuruman sa fadon na Gad en skin.
Ma a sa lon den kmoto na en tapu.
20Den gron fu Aser sa gi bun nyanyan,
nyanyan di fiti wan kownu.
21Naftali gersi wan yongu dia.
Switi wortu e kmoto fu en mofo.
22Yosef na wan yongu froktubon
di tnapu na sei wan watrabron.
A e panya en taki abra a skotu.
23Den feyanti fu en, di no lobi en
sutu furu peiri na en tapu.
24Ma en anu no beifi,
a anu di hori en bo no seki.
Bika a Tranga Gado fu Yakob ben de nanga en.
A ben tiri en leki wan skapuman, a ben tnapu gi en leki wan bergi.
25A Gado fu den afo fu yu sa yepi yu.
A Gado di abi ala makti sa blesi yu
A sa gi alen fu loktu,
nanga watra di e kmoto dipi ondro gron.
A sa blesi den borsu
nanga den bere fu den mama.
26Den blesi fu yu p'pa moro bigi.
Den bigi moro ala sani di den owru bergi man gi,
moro den bun sani fu den pikin bergi.
Den blesi sa kon tapu a ede fu Yosef,
tapu a mindri ede fu a wan,
di den ben teki puru mindri den brada fu en.
27Benyamin gersi wan krasi meti.
Mamanten a e swari san a kiri,
neti a e prati san a feni.”
28Disi na den twarfu lo fu Israel. Disi na san den p'pa ben taigi den di a e blesi den. A ben gi ibriwan en eigi blesi.
29Baka dati Yakob komanderi den taki: “Mi o dede go na den bigisma fu mi. Un mus beri mi pe den afo fu mi beri, ini a bergi-olo tapu a gron fu Efron, a Hetitiman. 30Dati na a bergi-olo fu Makpela, di de na abrasei fu Mamre, na ini Kanaan. Na a gron dati Abraham ben bai fu Efron, a Hetitiman, fu a ben kan abi wan eigi berpe. 31Na drape den beri Abraham nanga en frow Sara. Drape den beri Isak nanga en frow Rebeka, èn na drape mi beri Lea. 32Na fu den Hetitisma a gron dati nanga a bergi-olo ben bai.” 33Di Yakob taki ala den sani disi, a hari en futu kon baka tapu en bedi dan en bro koti. A dede go na den bigisma fu en.
