1A boskopu fu Gado. Disi na san MASRA taigi mi fu Israel.
Na so MASRA taigi mi, A Wan di span a heimel na loktu, di poti grontapu tnapu tapu en fundamenti èn di meki a yeye fu libisma poti na ini libisma. 2“Luku, Mi sa meki Yerusalem de leki wan kan di e drungu ala tra folku lontu den. Efu den lontu Yerusalem fu feti nanga en, den o teki Yuda abra tu. 3A dei dati Mi o meki Yerusalem de leki wan hebi ston di ala den tra kondre mus opo. Ma ala sma di opo en o kisi hebi mankeri. Ala folku fu grontapu o kon makandra drape fu feti nanga en. 4Ma MASRA taki tak' a dei dati A sa meki ala den asi bruya. A sa meki den man di e tyari den asi lasi den ferstan. Mi sa hori ai na tapu den sma fu Yuda, ma Mi sa meki ala den asi fu den tra folku kon breni. 5Dan den edeman fu Yuda sa taki ini densrefi taki: ‘A krakti fu wi na den sma fu Yerusalem, tangi fu MASRA fu ala sani, a Gado fu den.’ 6A dei dat Mi sa meki den edeman fu Yuda de leki wan frambo mindri udu, leki wan faya mindri a drei grasi. Den o bron ala den tra folku na let'sei nanga kruktusei fu den. Yerusalem sa tan leti pe a de.
7MASRA sa gi den sma fu Yuda a wini fosi. A sa du dati fu a famiri fu David nanga den sma fu Yerusalem no kisi wan moro bigi nen moro di fu Yuda. 8A pisten dati MASRA sa kibri den sma fu Yerusalem fu noti no miti den. A swakiwan na den mindri sa tranga a dei dati leki David. A famiri fu David sa tiri den leki Gado, neleki efu na a Engel fu MASRA srefi e go na den fesi.
