2MASRA fu ala sani taki tak': A pisten dati Mi sa figi ala den nen fu den kruktu gado puru na ini a kondre. Sma no sa memre den moro. Mi sa yagi den falsi profeiti nanga den doti yeye puru na ini a kondre tu. 3Efu wan sma wan taki sani leki profeiti, dan en eigi m'ma nanga en p'pa di meki en, sa taigi en taki: ‘Yu mus dede, fu di yu e taki sani di no tru ini a nen fu MASRA.’ Iya, en eigi m'ma nanga en p'pa o sutu en kiri te wan taki sani leki profeiti. 4A pisten dati den profeiti sa syen fu taki den sani di den si. Den no sa weri a langa dyakti fu wiwiri di den profeiti e weri, fu ferteri den sma sani di no tru. 5Den alamala sa taki: ‘Mi a no wan profeiti. Mi na wroko mi e wroko gron. Leki pikin boi den ben seri mi leki srafu.’ 6Te den aksi taki: ‘San na den marki na yu mindribaka?’ A sa piki taki: ‘Mi kisi den di den naki mi na mi mati oso.’
7Na so MASRA fu ala sani taki: ‘Yu mus opo, deigri fu Mi! Opo fu feti a skapuman fu Mi, feti a mati fu Mi. Naki a skapuman, dan den skapu sa bruya. Dan Mi sa feti den pikinwan.’ 8Na so MASRA taki: ‘Fu ala dri sma ini a kondre tu o figi puru na pasi èn dede gwe. Wan fu ala dri nomo sa tan na libi. 9Mi o bron den dati na ini faya fu den kon safu, leki fa den e du nanga solfru. Mi o bron den leki fa den e bron gowtu fu puru ala doti na ini. Den sa kari Mi nen èn Mi sa piki den. Mi sa taki: Disi na Mi folku, èn den sa taki: MASRA na wi Gado.’ ”
